चलचित्र ‘बुलबुल’लाई ‘साउथ एसियन फिल्म फेस्टिभल’मा पब्लिक च्वाइस अवार्ड

काठमाडौं । नेपाली कथानक चलचित्र ‘बुलबुल’ले ‘साउथ एसियन फिल्म फेस्टिभल’मा पब्लिक च्वाइस अवार्ड जितेको छ । प्रतिष्ठित फिल्म फेष्टिभल मध्येको एक साउथ एसियन फिल्म फेस्टिभल’मा छनोट भएको ‘बुलबुल’ले पब्लिक च्वाइस अवार्ड जितेको हो । गएराति सम्पन्न अवार्ड समारोहमा ‘बुलबुल’ले अवार्ड पाएको निर्देशक विनोद पौडेलले जानकारी दिए । “यो अवार्डले आगामी चलचित्रमा थप मिहिनेत गर्ने उर्जा प्रप्त गरेको छ,” पेरिसमा रहेका निर्देशक पौडेलले भने, “यो अवार्ड बुलबुलले जित्नु भनेको समग्र नेपाली चलचित्र उद्योगले जित्नु हो ।”

उनले अगाडि थपे, “फेष्टिभलमा नेपाली चलचित्रले अवार्ड जित्नु नेपाली चलचित्रको विदेशी बजारमा प्रचारप्रसार हुनु पनि हो ।”‘साउथ एसियन फिल्म फेस्टिभल’ जनवरी २८ देखि फेब्रुअरी २ सम्म फ्रान्सको पेरिसमा भएको थियो । फेस्टिबलमा चलचित्रकी मुख्य अभिनेत्री स्वस्तिमा खड्का र निर्देशक विनोद सहभागी भएका थिए । साउथ एसियन फिल्म फेस्टिबल’मा यस अघि मीन भामको ‘कालो पोथी’ र दीपक रौनियारको ‘ह्वाइट सन’ पनि छनोट भएका थिए ।फिमेल प्रोटागोनिष्ट चलचित्र ‘बुलबुल’ श्रीमान् विदेशमा रहेकी श्रीमतीले सहरमा विरामी बुढो ससुरा बुवा र छोरीलाई पालेर बस्ने महिलाको इमोस्नल क्राइसिसको कथा हो ।