ओलीइतर समुहका मन्त्रीहरुको गोजीमा राजीनामा पत्र

काठमाडौं । प्रधानमन्त्री केपी शर्मा ओलीले राजीनामा नदिए उनीइतर समुहका नेताहरु निकटस्थ मन्त्रीहरुले राजीनामा दिने तयारी गरेका छन् । उनीहरु अब बस्ने मन्त्रिपरिषद बैठकमा गोजीमा राजीनामा लिएर प्रस्तुत हुने भएका छन् ।विश्वस्त स्रोतका अनुसार अध्यक्ष पुष्पकमल दाहाल प्रचण्ड, वरिष्ठ नेताद्वय माधवकुमार नेपाल र झलनाथ खनालका अलावा उपाध्यक्ष बामदेव गौतम निकटस्थ मन्त्रिहरुलाई राजीनामाका लागि तयार हुन भनिएको छ । उनीहरुले हाइकमान्डको निर्देशनलगत्तै राजीनामा तयार गरेका छन् । मन्त्रिपरिषद बैठकमा पुग्दा उनीहरु गोजीमा राजीनामापत्र लिएर पुग्नेछन् ।

प्रधानमन्त्री ओलीले मन्त्रिपरिषदको आगामी बैठकमा कडा कदम चाल्ने तयारी गरिसकेका छन् । उनले संकटकाल घोषणाको सिफारिशलगायत अन्य निर्णय गर्ने सम्मको तयारी गरेको बुझिएको छ । यस्तो अवस्थामा प्रधानमन्त्रीले लिने निर्णयमा असहमति जनाउने गरी ओली इतरका मन्त्रीहरु तयारी अवस्थामा छन् ।यसअघि हिजो बसेको स्थायी कमिटि बैठकमा बामदेव गौतमले एमाले नामको पार्टी दर्ता बढाइएको देखि संकटकाल लगाउने सम्मको योजनाको खुलासा गरेका थिए । यसलाई दृष्टिगत गरी ओलीइतरका नेताहरुले मन्त्रीहरु, स्थायी कमिटि सदस्य देखि सांसदहरुलाई तयारी अवस्थामा रहन भनेका छन् ।रिपोर्टस नेपाल